Alif by Umera Ahmed Episode 5 Roman

Alif by Umera Ahmed

ALIF
Episode -05

Mere payarey ALLAH
Aaj mein ne baba ko phir khawab mein sitara bantay dekha. Jaisay Turkey mein dekha tha. Tab mein ne unhen sitara bantay dekha tha phir woh aag ka golah ban gaye aur phir woh bohat door chalay gaye. Aaj phir mein ne unhen door jatay dekha aur meri aankhh khul gayi. Baba kahin bhi nahi they. Mein bohat udas hon. bohat ziyada.
Mein ne aap ko apne baray mein nahi bataya. Pehlay –apne baray mein batana chahiye tha. Mera naam QALB E MOMIN hai. Aap ko yaad hai kayi mahinay pehlay mein aap ko khat likha karta tha. Tab mein Turkey mein rehta tha, ab Pakistan mein rehta hon .
Aap ne mere khitton ke jawab mere dada ko behje they magar dada ne woh mujhe nahi diye. Aap ko mein yaad aagaya na? Mujhe pata tha mein aap ko yaad aajaon ga kyun kay mammy kehti hain aap kabhi koi cheez bhool hi nahi satke khaas tor par unn ko jo aap se pyar karte hon aur mein to aap se bohat pyar karta hon…dekhen mein ne aap ke liye hearts bhi banaye hain. Aur hamesha ki terhan is khat par phool aur setaaray bhi banaye hain. Rangeen pencils se.
Aap sochte hon ge agar mein aap se itna pyar karta hon to phir aap ko itnay mahino se khat kyun nahi likhta raha. Mein aap ko bhola nahi hon bas Pakistan aagaya hon lekin aap se roz batain karta hon raat ko bistar par late kar sonay se pehlay. Jab supaara parhta hon tab bhi aap ko yaad karta hon aur jab namaz parhta hon tab bhi…. Namaz saari nahi parhta aur roz bhi nahi parhta, lekin seekh raha hon aap naraaz mat hona mujhe pata hai aap naraaz nahi hon ge kyun kay mein bacha hon aur aap bachon se bohat pyar karte hain.



Hum ab bohat barray ghar mein rehtay hain lekin mein yahan khush nahi hon. Mujhe apna school yaad aata hai. Apne dost bhi aur woh jungle bhi jahan mein aap ke liye khat chore kar aata tha. Mein ne yahan bhi aik jagah dhondh li hai jahan mein aap ke liye khat chore sakta hon.
Mere pyarey ALLAH mera dil Pakistan mein nahi lagta yahan ab hamaray paas woh sab kuch hai jo mein aap se mangta tha. bara sa ghar, gaari aur woh saari cheeze jo mein aap se mangta tha. Woh mammy mujhe bazaar se le deti hain. Sab kuch mil gaya hai mujhe lekin mammy kho gayi hain. Yeh meri wali mammy nahi hain. Woh allag kamray mein rehti hain aur mein allag kamray mein aur kabhi kabhi woh kayi kayi din ghar bhi nahi aatin. Mujhe lagta hai unhen ab meri aur baba ki parwa nahi hai. Woh ab baba ko miss nahi kartin. Unn ke liye pehlay ki terhan roti bhi nahi hain. Ab bohat achay aur mehangay kapray pehanti hain. Zewar bhi, make up bhi…. Aur woh bohat hanstie hain….. bohat bohat ziyada…… kabhi kabhi woh itna hansti hain ke mujhe unn par gussa aata hai.
Mujhe unn ke baray mein bohat saari kharab baton ka bhi pata chal gaya hai lekin woh meri mammy hain is liye mein aap ko nahi bta sakta. Iske liye sorry.
Mujhe ab baba bohat yaad atay hain aur dada bhi.
Mere pyarey Allah kya aap mujhe unn dono ke paas turkey nahi bhaij satke. Mera dil mammy ke pass nahi lagta. Woh mujhe aik churail lagti hain. Mujhe pata hai mujhe mammy ko yeh nahi kehna chahiye lekin mujhe unn par gussa aata hai. Mujhe lagta hai unhon ne mere baba ko jaan boojh kar naraaz kya hai. Agar woh turkey mein rehtin to baba mil jatay. Mein khud dhondh laita unn ko. Mujhe har kho jaaney wali cheez ko dhondhna aata hai.
Mere payarey Allah mein ne aap se kaha tha aap meri mammy aur baba ki sulah krwadin aur hum sab ikathay rahen lekin aap ne mujhe jo jawab bheja tha woh dada ne mujhe nahi diya. Aur ab dada bhi kahin gum hogaye hain.
Mein bohat udas hon yahan Pakistan mein. Aap ko khat is liye likh raha hon taakay aap mere liye kuch karen.
Kya aap mere par uga satke hain taakay mein urr kar Turkey chala jaoon aur mammy mujhe dhoundti reh jayen? Mujhe pata hai aap sab kuch kar saktay hain. Aap kab mujhe apne baba aur dada se milwaayen ge…..? Jaldi milwa dein…. Mein bara hogaya to woh mujhe nahi pehchanen ge. Ab mein sonay laga hon. aap bhi sojayin.
aap ka
QALB E MOMIN
*—-*—-*

Facebook Comments

You may also like this

09 May 2022

دانہ پانی - عمیرہ احمد - قسط 2

<p style="text-align: right;">بسم اللہ الرحمن الرحیم دانہ پانی قسط نمبر02 عمیرہ احمد<

UA Books
12 April 2022

Daana Paani English Episode 1

<span style="font-size: 24px;"><strong>Daana Paani </strong>by <a href="https://uabooksonline.com/author/umera-ahm

UA Books
06 April 2022

دانہ پانی - عمیرہ احمد - قسط 1

<p style="text-align: right;"><span style="font-family: 'Jameel nastaleeq';">بسم اللہ الرحمٰن

UA Books

Leave Comment